БИШКЕК, 5-окт. — Sputnik. Борбордук шайлоо комиссиясы парламенттик шайлоонун жыйынтыгын жарыялоону көпкө создуктурбай турганын БШК төрагасы Туйгунаалы Абдраимов журналисттер үчүн өткөрүлгөн жыйында белгиледи.
Абдраимовдун айтымында, үч күндүн аралыгында республикадагы аймактык шайлоо комиссиялары түшкөн арыздарды карап, протокол түзгөндөн кийин аларды БШКга жөнөтүшү керек. Анын негизинде менен комиссия чогулуш өткөрүп, шайлоонун расмий жыйынтыгын жарыялайт. Мыйзам боюнча жыйынтык 18-октябрдан кеч эмес жарыяланышы керек.
"Мандаттардын бөлүштүрүлүшүн расмий жыйынтык чыккандан кийин гана айта алам", — деди Абдраимов.
Sputnik агенттигинин божомолуна ылайык, алдын ала алынган жыйынтык боюнча мандаттар төмөнкүчө бөлүштүрүлүшү мүмкүн:
- КСДП — 38 мандат;
- "Республики — Ата-Журт" — 28;
- "Кыргызстан" — 18;
- "Өнүгүү — Прогресс" — 13;
- "Бир Бол" — 12;
- "Ата Мекен" — 11.
2015-жылдын 4-октябрында өткөн кезектеги парламенттик шайлоодо Кыргызстандын тарыхында биринчи жолу биометрикалык маалыматтар колдонулду. Добуш бергендердин саны 1 миллион 557 миң 442ге жеткен.
