БИШКЕК, 1-окт. — Sputnik. Кыргызстандын борбор калаасында Эл аралык карылар күнүнө арналган социалдык жармаңке өтүүдө.
Иш-чаранын негизги максаты — өзүнө өзү жардам берген топторду өнүктүрүүгө жана кошумча каражат булагын табууга коомчулук менен мамлекеттин көңүлүн буруу.
Жармаңке Эркиндик проспектинде өтүп жатат. Акцияга премьер-министр Темир Сариев келип, ата-энесин кароосуз, болгондо да жалгыз калтырып кеткен балдардын жоругу жан кейите турганын белгиледи.
"Карылардын укугу алардын балдары тарабынан камкордукка алынышын камсыздаган мыйзам долбоорлору иштелип чыгышы керек. Өлкөбүздө карылар үйлөрүнүн, интернаттардын азайышын, ага муктаждыктын таптакыр жоюлушун каалар элем. Карыларга камкордук көрүү — ар бирибиздин милдетибиз, муну биз иш жүзүндө далилдешибиз керек", — деди өкмөт башчы.
Премьер-министр жармаңкенин катышуучуларына бекем ден соолук, ийгилик каалап, карылардын ар бир күнү жылуулукка, камкордукка бөлөнүшүнө тилектеш экенин айтып өттү.
Сариев өзү бир нече буюм сатып алып, иш-чаранын алкагында өткөрүлүп жаткан шахмат боюнча турнирдин байге фондусун өз чөнтөгүнөн толуктады.
