БИШКЕК, 30-сен. — Sputnik. Жетимдердин ата-энесинен калган үйдү алдап сатып жиберген факт катталганын Акыйкатчынын маалымат кызматы билдирди.
Нарын облусунун Кочкор районунун тургуну Таабалды кызы Акжолтой ата-энесинин мыйзамсыз сатылып кеткен үйүн кайтарып берүү өтүнүчү менен Акыйкатчыга арыз жазган.
Акыйкатчы аппаратынын кызматкерлери текшерүү учурунда үйдү сатууда көптөгөн мыйзам бузуулар аныкталганын билдирди. Үйдү сатууда жетимдердин каза болгон апасынын колу жасалмаланган. Мыйзам боюнча, там сатылып жатканда балдар жашы жете элек болгондуктан атайын комиссиянын макулдугу керек болчу. Бирок андай аракеттер көрүлгөн эмес.
Аталган факты боюнча Акыйкатчы аппаратынын кызматкерлери Б.М. аттуу жарандын аракетине юридикалык баа берүү үчүн жана кылмыш ишин козгоо жөнүндө арыз менен Ат-Башы районунун прокуратурасына кайрылышкан. Бул ишти Нарын облустук Финансы полициясы да иликтейт.
Учурда материалдар сотко берилди. Таабалды кызы Акжолтойдун арызын акыйкатчынын милдетин аткаруучу Гүлнара Жамгырчиева жеке көзөмөлүнө алды.
