БИШКЕК, 19-сен. – Sputnik. Калый Молдобасанов атындагы Кыргыз Улуттук консерваториясында Ноо Нобору Кацуми театрынын бет капчан актерлору үнсүз кыймылдары менен Күн Чыгыш өлкөсүнүн сырдуу театр өнөрүн көрсөттү.
Анын ачып жатып сүйлөгөн маданият, маалымат жана туризм министри Алтынбек Максүтов келгендерди куттуктап, маданият жана искусство жаатында, дегеле, кыргыз жана япон элдеринин өз ара достук мамилелерин өнүктүрүү маанилүү экендигин айтты.
"Бүгүн маданият аралык диалог жана гумантардык багыттагы биздин байланыштарыбыз өлкөлөр аралык кызматташуубузга жаңы өңүттү тартуулап жатат", — деди министр.
Ноо – япониядагы эң байыркы делген театрлардын бири, анын тамыры XIV кылымга барып такалат. Ал ЮНЕСКОнун материалдык эмес мурастарынын тизмесине киргизилген.
