КАДАМЖАЙ, 17-сен. – Sputnik. Кадамжай районунун Актурпак айыл аймагындагы Бүргөндү массивиндеги каналды ачып жаткан салтанатта эл Алмазбек Атамбаевди бүгүнкү туулган күнү менен куттуктады.
Атамбаев Баткен облусуна жасаган иш сапарынын алкагында Бүргөндү массивиндеги 6,5 чакырым каналды салтанаттуу ачты.
Аталган айылдык кеңештин төрагасы Алмаз Имаровдун айтымында бул каналы жаңы өздөштүрүлүп жаткан Бүргөндү аймагын ичүүчү жана сугат суулары менен камсыздайт.
"Мурда бул жакта такыр суу болгон эмес. Жалпысынан төрт гектар жер үй салууга бөлүнөт. Бул жакка Ош, Баткен, Алай, Чоң-Алай, Лейлекте турак-жайга өтө муктаж болгондор көчүп келет. Азыр канал уланып, дагы бир чакырымдай курулат. Күздөн тартып жерди таратып баштайбыз, тизмеси даяр", — деди ал.
Имаров Бүргөндү массивине элди көчүрүп келүү стратегиялык жактан маанилүү болгон үчүн мамлекеттин көзөмөлүндө турганын кошумчалады. Себеби аталган аймак Өзбекстан менен чектешет.
"Биз чек араны коргоо үчүн Өзбекстан менен чектешкен бул жерди калктуу аймак кылып жатабыз", — деди ал.
Бүргөндү аймагына суу жетсе, бардык мөмө-жемиштер быша турганын айылдык кеңештин төрагасы кошумчалады.
