БИШКЕК, 17-сен. – Sputnik. Премьер-министр Темир Сариев тез арада Чоң-Алай районундагы "Карамык" чек заставасында дайынсыз жоголуп кеткен чек арачы боюнча ишти иликтөө үчүн экинчи комиссия түзүүнү тапшырды. Бул тууралуу өкмөттүн маалымат кызматы билдирди.
Баардиновду аң уулоого анын жетекчилери жиберген деген версияны алгач, анын апасы айткан, кийин Мамлекеттик чек ара кызматы өз алдынча аң уулоого кеткен деген маалымат тараткан.
"Сариев вице-премьер-министр Абдырахман Маматалиевге жоголуп кеткен чек арачы Баардиновдун иши боюнча экинчи комиссия түзүүнү тапшырды", — деди өкмөттүн маалымат кызматынын жетекчиси Назира Ахмедова.
Ал биринчи териштирүү Чек ара кызматынын бир нече офицерин иштен алуудан башка эч кандай конкреттүү аракеттер жасалбаганын белгиледи.
Буга чейин аталган кызмат чек арачыны издөө бир нече багыт боюнча жүргүзүлүп жатканын билдирген. Издөө иштери кыргыз-тажик чек арасынан тышкары айыл-кыштактар да камтылган. Аймакка Башкы штабдын МИ-8 тик учагы да тартылган. Мындан тышкары, издөө иштерине ИИМ, УКМК жана жергиликтүү тургундар да кошулган.
