БИШКЕК, 16-сен. — Sputnik. Акыркы кездери Сирияга кетүүгө камынган аялдар көп болуп жатканын Кыргызстандын ИИМинин 10-башкармалыгынын жетечисинин орун басары Раим Салимов билдирди.
Ал 2015-жылдын сегиз айынын жыйынтыгында, өлкөдө катталган бардык экстремисттердин 23 пайызын аялдар түзөрүн айтты.
Анын сөзү боюнча, аялдардын мындай кадамга барып жатышына социалдык жана үй-бүлөлүк абалы, ошондой эле миграциянын агымы да себеп болууда.
"Үй-бүлөсүн бул жакка калтырып жумуш издеп Россияга кеткендер көп болууда. Ал жактан башка аялга үйлөнүп алып, бул жерде калган үй-бүлөсүнө акча салбай койгон учулар көп. Кыргызстанда калган келинчеги акчасы жок балдарды кантип багам деп ойлойт. Алардын кеминде эле 2-3 баласы бар. Мунун айынан үйдө да түрдүү көйгөйлөр чыгат. ошондой абалдан чыгуу үчүн Сирияга кетейин дегем деп кармалган аялдар бар", — дейт Салимов.
Мындай аракеттер тар түшүнүктөн, маалыматтын жоктугунан болуп жатканын ал баса белгиледи.
Салимов акыркы учурларда үй-бүлөсү менен Сирияга кетип айткандар келечекте чоң коркунуч туудурарын айтты. Башында Сирияга 30-40 жаштардагы кишилер кетип жаткан болсо, азыр үй-бүлөсү менен кеткендер бар экенин айтты.
"2013-жылы бир үй-бүлөдөн жети баласы жана аял-күйөөсү болуп тогуз киши кеткен учур катталган. Балдардын оюн, идеологиясын алмаштыруу оңой, ага эч кандай каражаттын кереги жок. Себеби, балдар согуштун арасында жүрөт, алардын дүйнө таанымы өзгөрөт. Алар экстремисстик топтун даяр мүчөлөрү болуп калат. Эң коркунучтуусу, мындай идеяга сугарылган балдар кийин кайта Кыргызстанга келе турганында. Беш жашынан тартып башка идеологияга сугарылган кишинин ой жүгүртүүсүн, дүйнө таанымын өзгөртүү кыйын", — дейт ал.
Мындай абалдын жаралышына интернет сайттары жана социалдык тармактар да көп таасир берип атканын кошумчалады.
Бүгүнкү күнү өлкө боюнча диний экстремисттик жана террористтик көз карашты колдогон 1866 адам каттоодо турат.
