2015-жылы өтүүчү парламенттик шайлоону утурлай, партия июнь айында кезектеги III съездин өткөргөн. Ага өлкө аймагынан келген 300дөн ашуун делегат партиянын жаңы уставын бекитип, жаңы программанын манифестин кабыл алган. Партиянын лидери болуп, Чүй облусунун эск-губернатору Канатбек Исаев шайланган.
Бул партия "биз ар бир кыргызстандык чыныгы өзгөрүүлөрдү сезишин жана өлкө эл аралык аренада татыктуу орунга ээ болушун каалайбыз" деген пикирди карманат.
"Кыргызстан" партиясынын маалыматына ылайык, партиянын мүчөлөрүнүн аракети менен жаралган 100дөн ашык ишкана өлкө аймагында иш алып барат.
Партиянын курамында чет өлкөдө иштеп, ал жактан чогулткан тажрыйбасын, каражатын кайра туулуп-өскөн өлкөсүнө алып келип, бул жакта кызмат кылууга жумшайм деген атуулдар да бар.
"Кыргызстан" саясий партиясынын билдирүүсүндө "бир гана жаратмандык менен өзгөчөлөнбөй, парламентке өткөндө мүмкүн болушунча өлкө жашоочуларынын көп бөлүгүнүн ишенимине арзып, саясий чечимдерди кабыл алууда да көңүл борборунда болууну көздөйбүз" деп жазылган.
