БИШКЕК, 25-авг. — Sputnik. Мамлекеттик каттоо кызматы Кыргызстандын тарыхында биринчи жолу шайлоо сапаттуу тизме менен өтөрүн белгилеген, бирок бул тизме мамлекеттин тарыхындагы эң сапатсыз тизме экенин БШК төрагасы Туйгунаалы Абдраимов маалымат жыйынында билдирди.
Анын айтымында, Мамлекеттик каттоо кызматынын тизменин деңгээли тууралуу айтканы чындыктан өтө эле алыс.
"Мисалы, "Акжар" жаңы конушунда биометрикалык маалыматын 14 миң шайлоочу тапшырган. Бирок алар азыр аталган конушта эмес, республиканын ар кайсы жерлеринде жүрөт экен", — дейт төрага.
Абдраимов Бишкекте биометрикалык маалымат тапшырган 200 миң шайлоочу мамлекеттин ар кайсы булуң-бурчунда жүргөнүн, аларды бир шайлоо участкасына байлоо мүмкүн эмес экенин кошумчалады.
Талапка ылайык, 16 жаштан жогору болгон бардык жарандар бармак издерин, санарип сүрөтүн жана электрондук кол тамгасын тапшырууга милдеттүү. Жалпысынан Кыргызстан боюнча 3 миллион 641 киши жеке маалыматтарын тапшыруусу керек деп болжонууда.
