БИШКЕК, 21-авг. — Sputnik. Кыргызстан эл аралык "Астана ЭКСПО-2017" көргөзмөсүнө катышат. Тиешелүү документке КРдин Соода-өнөр жай палатасынын президенти Марат Шаршекеев менен Казакстандын тышкы иштер министринин орун басары, "Астана ЭКСПО —2017" көргөзмөсүнүн комиссары Рапиль Жошыбаев кол койгонун мекеменин маалымат кызматы билдирет.
Жолугушуу учурунда Жошыбаев көргөзмө көп мамлекеттердин кызыгуусун жаратып жатканын белгиледи.
Өз кезегинде Шаршекеев ири эл аралык иш-чарага чакырганы үчүн комиссариатка ыраазычылык билдирди.
"Кыргызстандын жашыл энергетикасын өнүктүрүүгө кеңири шарты бар. Тоо, көл жана суу ресурстары энергиянын альтернативалуу булактарын ишке киргизүүгө мүмкүнчүлүк берет. Мындай жетишкендиктер "ЭКСПО-2017" сөзсүз көргөзмөсүндө айтылышы керек", — деди мекеме жетекчиси.
Жолугушууда көргөзмөнүн негизги тематикасынан тышкары экономикалык жана туристтик мүмкүнчүлүктөр, иш-чарага катышкан мамлекеттердин бизнес өкүлчүлүктөрүнүн өз ара кызматташуу мүмкүнчүлүгү көрсөтүлөрү макулдашылды.
