БИШКЕК, 21-авг. — Sputnik. Өкмөт мамлекеттик органдарда иштеген кызматкерлердин санын көбөйтүүгө мораторий киргизүүгө ниеттенип жатканын өкмөттүн жыйынында премьер-министр Темир Сариев билдирди.
Анын айтымында, мамкызматкерлердин айлык акы фонду бул жылы 41 миллиард сомду түзүп, 19 пайызга жогорулаган.
"Көп учурда айлык акынын көлөмү эч себепсиз жана каржылоо булагы аныкталбастан эле өсө берет. Андыктан өкмөт штаттык санды көбөйтүүгө мораторий жарыялоону демилгелеп жатат. Фонд жыл сайын 20 пайызга көтөрүлсө, экономика болгону 5-7 пайызга өсөт. Жакында тиешелүү документтерге кол коюлат. Болбосо, бир нече жылдан кийин бюджеттин теңи эле мамлекеттик кызматкерлердин айлыгына кетет", — деди премьер-министр.
Сариев жакында тармактык принциптен функционалдуулукка өтө турган өкмөттүн чакан структурасы иштелип чыгарын кошумчалады.
