БИШКЕК, 21-авг. — Sputnik. Каракол шаарынын "Жылуулук" ишканасынын директору мекемеге тиешелүү күнөскананы мыйзамсыз сатып, мамлекетке тогуз миллион сом зыян келтиргенин шаардык прокуратура аныктап чыккан.
Маалыматка ылайык, 2006-жылы аталган мекеменин директору Соцфонддун Ысык-Көлдөгү башкармалыгынын төрагасы менен сүйлөшүп, "Жылуулук" ишканасын камсыздандыруу мүчө төгүмү боюнча жасалма карызга батырган.
Аталган доо арыз сот тарабынан канааттандырылган. Директор жасалма карызынан кутулуу үчүн күнөскананы Соцфондго өткөрүп бергенден кийин башкармалык төрагасы аны кайра мурдагы ээсине — "Жылуулук" ишканасынын директоруна бир миллион 45 миң сомго сатып жиберген.
Текшерүү учурунда күнөскананын базар баасы тогуз миллион сомдон ашуун экени аныкталды.
Аталган факт боюнча Кылмыш жаза кодексинин 303-беренесинин (Коррупция) негизинде кылмыш иши козголуп, учурда тергөө башталды.
