БИШКЕК, 20-авг. — Sputnik. Режиссер Садык Шер-Нияздын "Курманжан датка" тасмасы Германиянын Котбус шаарында өтүүчү Эл аралык кинофестивалга катыша турганын "Айтыш фильм" студиясынын маалымат катчысы Чолпон Идрисова билдирди.
Маалыматка ылайык, тасма бейшемби күнү фестивалдын дирекциясынан расмий чакыруу алган.
"Курманжан датка" өз мекенинде көрсөтүүлөрдүн саны жана кассалык топтоолор боюнча голливуддук блокбастерлерден ашып түшкөн тасмаларды тартуулоочу "Улуттук хиттер" программасына киргизилди.
Аталган кинофестиваль биринчи жолу 1991-жылы өтүп, ошондон бери Чыгыш Европадагы бирден бир маанилүү иш-чара болуп саналат.
Киностудия "Курманжан датка" киноэпопеясы жакынкы арада Казань, Анапа жана Фукуока шаарларында өтө турган ири кинофестивалдарга да катыша турганын маалымдайт.
