БИШКЕК, 20-авг. — Sputnik. Кыргызстандагы билим берүүнүн сапаты талапка жооп бербей турганын билим берүү жана илим министри Элвира Сариева жыл сайын өтүүчү шаар мугалимдеринин методикалык конференциясында билдирди.
Анын айтымында, тематикалык олимпиада катышуучуларынын көрсөткүчү жогорку деп бааланганы менен, жалпы билим берүүнүн сапаты абдан төмөн.
"Дал ушул жыйынтыктар бизди мугалимдердин айлык акысын көбөйтүү, аттестацияны киргизүү, категорияны кайтаруу жана эң башкысы — мектеп программасын жаңыртуу чечимин кабыл алууга түрткү берди", — деди министр.
Сариева өкмөт тарабынан кабыл алынган билим берүүнүн жаңы стандартына ылайык, ар бир баланын билими анын жеке жетишкендигине жараша баалана турганын белгиледи.
"Программа жаңыртылган соң жаңы муун үчүн окуу китептери иштелип чыгат. Тил тармагындагы алгачкы жети стандартты иштеп чыгууга катышкан бардык мугалимдерге ыраазычылык билдирем. Бизге практик мугалимдер керек. Биз биргелешип биз балдардын, ата-энелердин, мамлекеттин жана коомдун бүгүнкү талабына жооп берген жаңы стандарттарды даярдай алабыз", — деди чиновник.
Өз сөзүндө министр Бишкектин мектептерин билим берүү сапатын жакшыртууга олуттуу мамиле жасоого чакырды.
