БИШКЕК, 10-авг. — Sputnik. Казакстандын Жамбыл облусунда катталган ири жол кырсыгына күнөөлүү деп шектелген автобустун айдоочусу камакка алынганын Sputnik агенттигине Казакстандын Жамбыл облусу боюнча ички иштер департаменти билдирди.
Казакстандын Жамбыл облусунун Моюнкум районунда 7-августта таңкы саат 06:40 чамасында "Алматы — Екатеринбург" кан жолунун 405-чакырымында автобус менен жеңил автоунаа кагышып, Кыргызстандын төрт жараны каза болуп, үч жаран оор абалда Приозерск шаарындагы оорукананын жандандыруу бөлүмүнө жаткырылган.
Аталган жол кырсыгы боюнча сот-медициналык жана сот-автотехникалык экспертиза дайындалып, Казакстандын Кылмыш жаза кодексинин 345-беренеси "Жол эрежесин бузуу" боюнча кылмыш иши козголду. Автобустун айдоочусу кармалып, убактылуу кармоо жайына камалды.
Каза болгондордун сөөгүн кечээ, 9-августта ӨКМ Кыргызстанга алып келди.
