Үй куруучулар эми жоопкерчилик жогорулатылган жаңы салык келишими боюнча иштешет

БИШКЕК, 30-июль — Sputnik. Кыргызстанда турак-жай куруучулар үчүн белгиленген сумманын өлчөмүндө салыктарды төлөө келишиминин формасы жана аны толтуруу тартиби бекитилди. Бул туурасында тийиштүү токтомго премьер-министр кол койгонун Мамлекеттик салык кызматынын маалымат кызматы билдирди.

Жылдын башынан тарта курулуш компаниялары салыкты тапкан пайдадан эмес, куруп жаткан үйдүн аянтына жараша төлөөгө мүмкүнчүлүк алышкан.

Жаңы келишим салык төлөөчү менен салык кызматынын ортосунда макулдашылган салыктык милдеттенмени аныктайт. Андан сырткары, сатылып жаткан турак-жайдын жалпы аянты ачык, так көрсөтүлөт. Бир чарчы метри 900 сомдук салыктын ставкасына көбөйтүлөт. Салыктын суммасы жергиликтүү кеңеш тарабынан белгиленген аймактык коэффициентке (0,3төн 1,2 ге чейин) жараша алмашылып турат.

Турак-жай куруучулар менен келишим 36 айдан ашык эмес мөөнөткө түзүлмөкчү.

Келишим турак-жай куруу чөйрөсүндөгү курулуштарга салык салууну жөнөкөйлөтөт. Аны менен кошо курулуш компаниялардын жеке жоопкерчилигин жогорулатып, салык төлөөдөн баш тартуунун техникалык мүмкүнчүлүктөрүн жокко чыгарат. 

Маалыматка ылайык, бүгүнкү күндө республика боюнча турак жай куруу кызматтарын көрсөтүүчү тогуз субъект салыктык келишимдин негизинде салык төлөө арызын беришти.