БИШКЕК, 29-июль — Sputnik. Көк-Мойнок айылына жакын Бишкек-Торугарт автожолунун 152-чакырымында он жашар кызды тебелеп, качып кеткен айдоочу кармалганын ИИМ билдирет.
Окуя болгон жерге келген милиция кызматкерлери алдын ала сурамжылоонун аркасында тебелеп кеткен машина күмүш түстүү унаа экени аныктаган.
Иликтөө иштеринин натыйжасында, 29-июлга караган түнү Кемин – Бишкек автожолунан кылмышка шектүү унаанын ээси, Тоң районунун 43 жаштагы тургуну кармалган. Айдоочу прицеп чиркелген "Фольсваген-Пассат" үлгүсүндөгү машинаны айдап жүргөн. Унааны текшерүү учурунда арткы терезелеринде жана бамперде чач жана кандын чачырандыларынын тагы табылган.
Учурда айдоочу Балыкчы шаарынын убактылуу кармоочу жайына киргизилди. Кылмыш иши козголуп, тергөө иштери башталды.
