БИШКЕК, 27-июль — Sputnik. "Репортер" сайтында адам өмүрүн алып кеткен жол кырсыгы боюнча окурмандын жарыяланган маалыматы кызматтык териштирүүдөн өтүп жатканын ИИМ маалымат кызматы билдирет.
Окурмандын айтымында, 18-июль күнү Абдрахманов менен Киев көчөлөрүнүн кесилишинде саат 17.30да 6056 ВС номерлүү унаанын айдоочусу жашыл светофорго өтүп бара жаткан аялды коюп кеткен. Натыйжада 54 жаштагы окурмандын энеси каза болгон.
Маалыматка ылайык, кара түстөгү унаанын терезелеринин баары караңгылатылган.
"Кырсык учурунда унаада 6056 ВС номери тагылып турган. Бирок тергөөчүнүн протоколунда В 2963 AР номери, ал эми унаа токтотуучу жайда В 2956 АТ номери көрсөтүлүп турат. Алды жактагы эки каптал жана маңдайкы терезелери караңгылатылбай калган", — дейт окурман.
Анын айтымында тергөөчү Бакыт Асаналиев адам өлүмүнө себепкер болгонуна карабастан, күнөөлүү адамды кармай элек.
"Иликтөө иштеринин учурунда айрым мыйзам бузуулар жана туура эмес малаыматтар анык болду. Тергөөгө ишенич болбосо жөнөкөй жаран акыйкаттуулукка жете алабы?" — дейт ал.
ИИМ азырынча эч кандай малаымат бере албай турганын, кызматтык теришитрүү жүрүп жатканын билдирди.
