БИШКЕК, 28-июль — Sputnik. Президент Алмазбек Атамбаев Жогорку Кеңештин төрагасы Асылбек Жээнбеков менен жолугуп, алдыдагы парламенттик шайлоону таза жана ачык өткөрүү, республиканын шайлоо системасындагы жаңылыктар жөнүндө сүйлөштү.
Жолугушууда мамлекет башчысы КРдин V чакырылыштагы Жогорку Кеңешинин ишмердигинин жыйынтыктары тууралуу маалымат алды.
Мамлекет башчысы жаңы саясий системанын – парламенттик демократиянын артыкчылыктарын көрсөткөн V чакырылыштагы Жогорку Кеңештин тарыхый өзгөчө вазыйпасын белгиледи.
"Бул система мамлекет менен коомдун ортосундагы мамилени ширелиштирет, ал эми өкмөт менен парламент толук кандуу бийлик бутактары болуп калышат. Бул болсо, бийлик менен оппозициянын ортосунда конструктивдүү мамиленин болушуна көмөк болуп, үзгүлтүксүз диалогду калыптандырат", — деди Алмазбек Атамбаев.
Президент Атамбаев алдыда боло турган Жогорку Кеңешке шайлоолорду адилеттүү жана ачык өткөрүү менен болочок парламенттин курамынын сапатын жакшыртуунун өзгөчө зарылдыгын баса көрсөттү.
Мамлекет башчысы өлкөнүн өнүгүшү үчүн парламенттик демократияны мындан ары жакшыртуунун маанилүү экендигин белгиледи.
