БИШКЕК, 22-июль — Sputnik. Президент Алмазбек Атамбаев Кыргызстан транзиттик өлкөгө айлана турганы жөнүндө Бишкек — Балыкчы трассасынын Кувакы — Балыкчы бөлүгүнүн ачылуу аземинде билдирди.
Маалыматка ылайык, аталган бөлүк Ысык-Көлдү айланта курула турган 460 чакырым жолдун алгачкы баскычы болот.
Президенттин айтымында, өлкөдө жолдор жигердүү курулуп жатат.
"Ош — Сары-Таш — Иркештам, Ош — Баткен — Исфана жолдорунун курулушу аяктады. Бишкек — Нарын — Торугарт жолу аяктоо алдында турат. Эми Балыкчы — Түп — Кеген жолу да жыл аягына чейин аяктайт деп ишенем", — деди өлкө башчы.
Атамбаев жолдун ачылып жаткан Кувакы — Балыкчы бөлүгү стратегиялык долбоор болгон Бишкек — Балыкчы — Казарман автожолуна түздөн-түз тиешеси бар экенин белгилеп өттү.
"Балыкчы – Түп — Кеген" жаңы трассасынын курулушу аяктагандан кийин бул альтернативалуу жол Чүй, Нарын, Ысык-Көл жана Жалал-Абад облустарын эле эмес, Кыргызстанды Казакстан, Россия жана Тажикстан мамлекеттир менен байланыштырат. Бул Кыргызстанга экономикалык көз карандысыздыкты сактап калуу менен Өзбекстандан кайып өтүп Россия — Казакстан — Тажикстан багытындагы транзиттик өлкөгө айлануусуна мүмкүнчүлүк берет", — деди президент.
Жолго эки катмар асфальт төшөлгөн, жаңы түтүктөр орнотулуп, беш көпүрө оңдолду. Жолдун туурасы 17 метрди түзөт. Кытайдын экспорттук-импорттук банкы тарабынан каржыланып жаткан "Бишкек — Балыкчы жолунун 147-171-чакырым бөлүгүн реаблилитациялоо" долбоорунун жалпы суммасы 38 миллион долларды түзөт. Бүгүнкү күндө 37,7 миллион долларлык иш көлөмү аткарылды.
