БИШКЕК, 20-июль — Sputnik. КСДП менен "Ата Мекен" партия лидерлеринин ортосундагы араздашуу коалициянын бузулушуна алып келиши мүмкүн экенин парламенттик көпчүлүк коалициясынын лидери Феликс Кулов билдирди.
Анын айтымында, Текебаев эч кандай ысымдарды атабастан, КСДП партия-клондорду түзүп жатат деп айыптаган. Буга Турсунбеков нааразы болуп, натыйжада ЖМКда депутаттардын тирешүүсү пайда болгон. Кулов түшүнбөстүктөрдүн себебин аныктап чыкканын маалымдады.
"Шайлоого катышууну каалагандардын баары уруксат алуу үчүн президент менен жолугууну максат кылат. Өлкө башчысы эч кимге шайлоого катышууга тыюу сала албайт, ал эми аймактарга чыккан партия өкүлдөрү Атамбаевдин колдоосуна таянып жатышкандыктарын айтууда. Бул Текебаевдин көз жаздымында калган эмес", — деди Кулов.
"Ар-Намыс" партиясынын лидери "Ата Мекендин" "Улуттар биримдиги" менен биригүүсүнө таң калганын жашырган жок.
"Текебаев муну "Улуттар биримдигинин" өз электораты бар экендиги менен түшүндүрдү. Ал эми аталган партиянын издөөгө алынган лидери тууралуу суроо жоопсуз калды", — дейт Кулов.
Ал азыр мамилелерди калыбына келтирүү боюнча сүйлөшүүлөр жүрүп жатканын кошумчалады.
