БИШКЕК, 27-июнь — Sputnik. Президент Алмазбек Атамбаев "аялдарга жана жаш курагы жете электерге мунапыс жарыялоо жөнүндө" мыйзамга кол койгонун өлкө башчынын маалымат кызматы билдирди.
Мыйзам Жогорку Кеңеш тарабынан 2015-жылдын 21-майында кабыл алынган.
Мындай категорияга бир же андан ашык жашы жете элек балдары бар, 55 жаштан жогору, I жана II топтогу майыптыктагы, жеңил кылмыш жасаган, кош бойлуу жана көп балалуу, үй-бүлөсүн жалгыз баккан, ошондой эле ден соолугу боюнча мүмкүнчүлүгү чектелген ата-энесин баккан аялдар кирет.
Мындан тышкары, мыйзамда I жана II топтогу майыптыктагы, биринчи жолу кылмыш жоопкерчилигине тартылып, жети жылга чейин эркинен ажыраган, жеңил кылмыш жасаган жашы жете электерге мунапыс жарыялоо каралган.
Мыйзам расмий жарыялангандан кийин күчүнө кирип, алты айдын аралыгында ишке ашышы керек.
