БИШКЕК, 22–июнь — Sputnik. Мекеме ЭКККМКнын эки кызматкерин кармоодо 20га жакын кесиптештери тоскоолдук жаратты деген билдирүүнү четке какты.
Буга чейин Коррупцияга каршы күрөшүү кызматы тарабынан ЭКККМКнын эки кызматкери пара алып жаткан жеринен кармалганы кабарланган. Маалыматка ылайык, алар аты аталбаган жарандан коркутуп эки жылдан бери акча алып жүрүшкөн. Ай сайын төлөнгөн каражаттын суммасы 120 миң сомду түзгөн.
"Кармоо учурунда ЭКККМКнын 20 чакты кызматкери келип, тергөө иштерине тоскоолдук жаратышты", — деп айтылган билдирүүдө.
Аталган факт боюнча Кылмыш жаза кодексинин 304-беренесинин (Кызмат абалынан кыянаттык менен пайдалануу) жана 313-беренесинин (Пара талап кылуу) негизинде кылмыш иши козголгон.
Бишкектин Биринчи Май райондук соту кармалгандарды эки айга камакка алуу чечимин кабыл алган.
