Жашы жете электерге үйдөн 22.00дөн кийин чыгууга тыюу салынат

© Sputnik / Константин Чалабов / Медиабанкка өтүүТерезенин алдындагы балдар. Архив
Терезенин алдындагы балдар. Архив - Sputnik Кыргызстан
Жазылуу
Түнкү саат ондон кийин көчөдөн кармалган балдар ата-энесинин же баккандардын колуна өткөрүлүп берилет. Ал эми мас абалындагы жашы жете элек балдар медициналык мекемелерге жөнөтүлөт.

БИШКЕК, 18-июнь — Sputnik. Жогорку Кеңеш депутаттары үчүнчү окууда жашы жете электерге саат 22.00дөн кийин үйдөн чыгууга тыюу салышты.

Демилгечилер Турсунбай Бакир уулу, Эристина Кочкарова жана Нуркамил Мадалиевдердин айтымында, аталаган мыйзам долбоор балдардын саламаттыгына, психикалык, интеллектуалдык, руханий жактан өнүгүүсүнө зыян келтирилишине жол бербөө максатында иштелип чыккан. 

Мыйзам долбоорунда балдардын баруусуна тыюу салынган коомдук жайлар так аныкталды.

Ага ылайык, балдарга шаар көчөлөрүндө, стадион, парк, коомдук унаа, бекет, аэропорт аймактарында улуу адамдардын коштоосу жок жүрүүгө болбойт.

Мындан тышкары, эми балдар түн катып көлмө, спорт аянттарына, соода түйүндөрүнө, тамактануучу, көңүл ачуучу жайларга, интернет, түнкү клуб, мончо, сауналарга бара алышпайт.

Күндүн кайсы убактысы экенине карабастан, улуу адамдардын коштоосу жок алкоголь ичимдиктери сатылган жерлерге баруусуна тыюу салынат. 

Түнкү саат ондон кийин көчөдөгү балдар ата-энелерине же аларды баккан адамга —өткөрүлүп берилет. Ал эми мас абалында кармалган жашы жете электер түз эле медициналык мекемелерге жөнөтүлөт.

Аталган мыйзам бузулса, балага жооптуу адам 300-500 сом, кызмат адамдары 500-1000 сом, ал эми юридикалык жактар 1000-1500 сом өлчөмүндө айып пул төлөйт.

18ге чыга электер жашы жете элек болуп саналат.

Жаңылыктар түрмөгү
0