БИШКЕК, 17-июнь — Sputnik. Жогорку Кеңешинин төрагасы Асылбек Жээнбеков баштаган парламенттик делегация Астанадагы кыргыз диаспорасынын өкүлдөрү менен жолукканын ЖК маалымат кызматы билдирет.
Жээнбеков баштаган парламенттик делегациясынын Казакстанга иш сапары 16-июнда башталган.
Кыргыз диаспорасы менен болгон жолугушууда төрага мамлекеттүүлүктү бекемдөө, экономикасы өнүккөн, кубаттуу Кыргызстанды куруу жаатында жүргүзүлүп жаткан иштерге токтолду.
"Шайлоолорду мыйзам чегинде адилет, таза өткөрүү мамлекеттик саясаттын приоритеттүү багыттарынын бири. Быйыл күзүндө парламенттик шайлоону калыс өткөрүү үчүн баардык шарт бар. Биометрикалык каттоодон өтүп, шайлоого активдүү катышып бериңиздер. Таза шайлоо – туруктуулуктун, өнүгүүнүн башаты", — деди Жээнбеков.
Төрага Кыргызстандын ЕАЭБге кошулушу мамлекеттер ортосундагы кызматташууну жакшыртып, миграция жаатындагы көйгөйлөрдү чечүүнү жеңилдетерин белгиледи.
"Кыргызстандын ЕАЭБге кирүүсү тарыхый чечим болду. Бир миллиард долларлык уставдык капиталы бар Кыргызстан-Россия өнүктүрүү фонду түзүлүп, ага Россия тарап бүгүнкү күнгө чейин 150 миллион доллар салды", — деди спикер.
Төрага Жээнбеков сыртта жүргөн боордошторду Кыргызстанга кайтаруу максатында аракеттер көрүлүп атканын билдирди.
"Бөтөн жерде иштеп жүргөн илимдүү-билимдүү мекендештерибизди өзүбүзгө тартуу үчүн жогорку маяна, мыкты шарт керек. Кудай буюрса, жакынкы аралыкта аны ишке ашырабыз. Ошол эле маалда алардын дагы мамлекетке деген патриоттук сезими күчтүү болушу абзел", — деп белгиледи Жээнбеков.
Эмгек мигранттары көйгөйлөрдү көтөрүп гана тим калбастан, өлкөнү алдыга жылдырууга арналган сунуш-пикирлерин да ортого салышты. Төрага Жээнбеков мекендештер көтөргөн ар бир көйгөй, сунуштар жоопсуз калбай тургандыгын, аларды жеке көзөмөлүнө аларын айтты.
