БИШКЕК, 15-июнь — Sputnik. Жогорку Кеңещтин спикери Асылбек Жээнбеков менен Казакстандын парламентинин Мажилисинин төрагасы Кабибулла Жакупов парламенттер ортосундагы кызматташуу боюнча парламенттер аралык Кеңештин түзүлгөнү тууралуу келишимге кол коюшту. Бул туурасында ЖКнын маалымат кызматы билдирди.
Жээнбеков жолугушууда Казакстан Кыргызстан үчүн негизги стратегиялык өнөктөш экенин, эки элдин тамыры, тарыхы, дини, тили бир экенин айтты.
"Казакстан Кыргызстандын тышкы экономикалык байланыш жаатындагы негизги соода өнөктөшү болуп саналат. Товар жүгүртүү боюнча ал Россия менен Кытайдан кийинки орунда турат", — деп белгиледи Жээнбеков.
Кабибулла Жакупов мамлекеттер жана парламенттер аралык мамилеге оң баасын берип, кандай гана маселе болбосун тараптар кеңешип, бирдиктүү позицияны тутунуп келгенин айтты. "Биз бир тууган элбиз. Сиздин иш сапар менен келгениңиз биздин карым-катыш жогорку деңгээлде экенин ырастайт", — деди Жакупов.
Ал ЕАЭБ боюнча Келишимди ратификациялоону тездетүүгө аракет кыларын кошумчалап, көтөрүлгөн маселелерди чечүүнү жеке көзөмөлгө аларын айтты.
