ОШ, 15-июнь — Sputnik. Кыргызстан – көп улуттуу өлкө, андыктан кишилерди улуттарга бөлбөө керектигин мамлекет башчысы Алмазбек Атамбаев Ош шаарында аскер кызматкерлери үчүн салынган көп кабаттуу үйдүн ачылышында сүйлөп жатып билдирди.
Анын айтымында, элдердин достугун, биримдигин сактоо кажет.
"Калкты улуттарга бөлгөндөр – элдин душманы", — деп өлкө башчысы баса белгиледи.
Ал ошондой эле, элдердин ортосундагы достукту сактоо керектигин айтып, аялдардын эмгегин баалап, элдин жыргалчылыгы үчүн иштөө керектигин белгиледи.
"Үй-бүлөнү унутпай, ага дайыма кам көрүш керек. Убагында мен жүк ташыгыч, короо шыпыргыч болуп иштегем. Дайыма иштеш керек! 2011-жылы президенттик шайлоодо мени менен бир талапкер дебатка чыккан. Ал төрт жыл иштеген эмес жана үй-бүлөсүнө кам көргөн эмес экен. Жумуш жана үй-бүлө жөнүндө да ойлош керек", — деди Атамбаев.
Президент андан сырткары балдардын келечегине да кам көрүүгө чакырды.
