БИШКЕК, 12-июнь — Sputnik. Ыргал Кадыралиеванын эки агасы Улан Кадыралиев менен Канжар Кадыралиевдин сот иштери бир өндүрүштө экенин Жогорку соттун маалымат катчысы Айнура Токтошева Sputnik маалымат сайтынын кабарчысына билдирди.
Анын айтымында, 1973-жылы туулган Улан Кадыралиев бейбашчылык менен айыпталууда. 2014-жылы 26-ноябрда Башкы прокуратура ага карата бөгөт коюу чарасы катары эч жакка кетпөөнү тандаган.
Ал эми 1980-жылы туулган Канжар Кадыралиев Кылмыш жаза кодексинин үч беренеси — алдамчылык, опузалап акча талап кылуу жана бейбаштык боюнча айыпталууда.
"22-июнда Октябрь райондук сотунда алардын иши каралат. Экөөнүн иши бир өндүрүштө", — деди Токтошева.
2015-жылы 27-мартта Бишкек шаарынын Октябрь райондук соту Канжар Кадыралиевдин баш коргоо чарасын карап, бир айга камакка алуу чечимин кабыл алган. 10-апрелде Бишкек шаардык сотунун сот коллегиясы биринчи инстанциянын токтомун жокко чыгарып, Кадыралиевге карата камакта кармоо чарасын үй камагына алмаштырган. Бирок Жогорку соттун сот коллегиясы Кадыралиевди бир ай камакка алуу чечимин чыгарган болчу.
