БИШКЕК, 10-июнь — Sputnik. Акыйкатчы Бактыбек Аманбаев Жогорку Кеңештин жылдык отчетту канааттандырарлык эмес деп табышын аны иштен алуу боюнча жасалган буюртма деп эсептей турганын билдирди.
Аманбаев добуш берүүнүн жыйынтыктары менен таптакыр макул эмес экенин, анткени иш жогорку деңгээлде жасалганын акыйкатчы институтунун маалымат кызматы аркылуу билдирди.
"Биз жети атайын доклад даярдаганбыз, эл аралык стандартка ылайыктап жети системалык укук бузууларды көтөрүп чыктык. Бул депутаттар менен чиновниктердин саясий чечими болду. Аларга тил алчаак акыйкатчы керек", — деди Аманбаев.
Омбудсмендин айтымында, Жогорку Кеңештин бул чечими Баш мыйзамдын 74-беренесине жана БУУнун Резолюциясына каршы келет. Анда акыйкатчынын негизги милдети адам укугунун абалы туурасында өз убагында кабардар кылуу деп айтылган. Ал эми отчет берүү – бул өкмөттүн милдети.
"Бул бир нече багытта жүргөн буюртма болду. Биринчиден, мамлекеттик башкы канал аркылуу менин кадыр-баркымды тебелөө. Мындан тышкары, депутаттардын чечими менен мага карата далилсиз козголгон кылмыш ишин жандандыруу аракети байкалып турат", — деди Аманбаев.
Акыйкатчынын отчетун парламентке алып келүүсү боюнча эки тараптын эки башка пикири айтылган. Аманбаев ал ЖКнын күн тартибине кирбей калганын айтса, ЖКнын маалымат кызматы баяндама тармактык комитеттин күн тартибинде эки айдан бери тургандыгын билдирген.
