БИШКЕК, 26-май — Sputnik. Кыргызстандык криминалдык авторитет Алмамбет Анапияевдин өлүмүнө байланышкан кылмыштын бети жакынкы арада ачыла турганын Sputnik агенттигине Белоруссиянын Тергөө комитетинин төрагасынын биринчи орун басары билдирди деп кабарлайт Sputnik Беларусь сайты.
2015-жылдын февралында Минскиде автоунаанын багажынан кыргызстандык криминалдык авторитет Алмамбет Анапияевдин сөөгү табылган. Ал АКШнын атайын кызматынын версиясы боюнча "Туугандар чөйрөсү" деп аталган мурдагы СССР өлкөлөрүнөн чыккан кылмышкерлердин тобуна кирчү. Бул өлүмгө байланыштуу кылмыш иши козголгон.
"Аталган ишти териштирүүдө биз бир топ алдыга жылдык. Бул кылмыш ишинин бети жакынкы арада ачылат деп айтууга мен үчүн олуттуу негиздер бар", — деди Волков.
Ошону менен катар, ал "кыргыз ЖМКларында эч негизсиз эле маалыматтар такай пайда болуп жатышын" өкүнүү менен белгиледи.
Ошондой эле, Волков беларусь укук коргоо органдары кыргыз кесиптештери менен тыгыз байланышта иштеп жатышканын билдирди. Анын айтымында, Анапияевдин өлүмү жөнүндө ишти Белоруссиянын тажрыйбалуу тергөөчүлөрү алып барууда.
"Чоң тергөө тобу түзүлгөн", — дейт Волков.
Тергөө боюнча жашыруун сырга таянуу менен ал ишти иликтөөнүн башка чоо-жайын айтуудан баш тартты.
Кыргызстандын ички иштер министрлигинин маалыматына ылайык, Гүлжигит Абилазизов криминалдык авторитетти өлтүрүү боюнча ишке күбө болгон. Учурда ал аталган министрликтин коргоосунда. Күбөнүн жактоочусунун айтымында, Абилазизовдун көрсөтмөлөрү кылмыш ишинин тергелишине тактык киргизе алышы мүмкүн.
Ошондой эле, бир катар кыргыз ЖМКлары аталган өлүмгө өлкөнүн мурдагы президенти Бакиевдин бир тууганынын тиешеси бар болушу мүмкүн деген маалымтты жайылтышкан. Буга байланыштуу Кыргызстандын президенти Алмазбек Атамбаев Белоруссия бийлигин КРдин мурдагы башчысы Курманбек Бакиевдин Минскидеги киши өлтүрүүгө катышы бар деп шектелген бир тууганын республикага өткөрүп берүүгө чакырган.
