БИШКЕК, 25-май — Sputnik. Бишкек шаарына жакын жайгашкан таштанды жайга союлган малдын сөөктөрүн да ыргытып кетишүүдө.
Санитардык талаптарга ылайык, союлган малдын сөөктөрү тиешелүү эрежелер катуу сакталып, өзүнчө атайы жайларга көмүлүшү керек.
Аталган жайга жакын жашагандардын айтымында, 2015-жылдын февралынан тарта сөөктөрдү бул жерге таштай баштаган. Бүгүнкү күндө болжол менен 150гө жакын малдын сөөгү ыргытылган.
Ветеринария жана фитосанитардык коопсуздук боюнча Мамлекеттик инспекциянын жетекчиси Самир Осмоналиев Sputnik маалымат сайтынын кабарчысына, буга Бишкек шаардык мэриясы көзөмөл кылышы керектигин айтты.
"Бул суроо парламентте да көтөрүлгөн. Айтылган фактылар боюнча союлган малдын сөөктөрүн таштоого тыюу салынганы туурасында бир нече эскертме бергенбиз. Ал эми муниципалитет борбор калаада таштандыны кайра иштеткен завод курулгандан кийин гана таштанды иргелип жана жок кылынаарын шылтоо кылып келет", — деди ал.
Мэриянын маалымат кызматы азырынча эч кандай маалымат бере элек.
