БИШКЕК, 13-май — Sputnik. Чаткал районунун Терек-Сай айыл аймагындагы Кызыл-Токой сайында сел суусу көбөйүп, ал нугунан чыгып короодо камалып турган 950 койду агызган. Жаратылыш кырсыгынан 169 гана кой тирүү калганын Чаткал райондук ветеринардык жана фитосанитардык коопсуздук башкармалыгынын жетекчисинин орун басары Мамырбек Мырзабеков Sputnik сайтынын кабарчысына билдирди.
Буга чейин Өзгөчө кырдаалдар министрлиги сел 300 койду агызып кетти деген маалымат тараткан.
Окуя болгон жерде жүргөн Мырзабековдун айтымында, райондогу тийиштүү органдардан атайын ыкчам комиссия түзүлүп, эртең мененки саат 7.30дар чамасында кырсык болгон жерге жөнөп кетишкен.
"Сел болгон учурда ал жерде сегиз адам болгон. Алар балдарын алып тоого качып чыгышкан. Жабыр тарткандар жок экен", — деди ал.
Мырзабеков ошондой эле, сел агызган койлордун 152синин өлүгү табылганын, 130 кой жарым жан болуп жолго чыгып калганын билдирди.
Койдун өлүктөрүн жергиликтүү бийлик өкүлдөрү чогултуп, атайын аңга көмө турганын райондук ветеринариянын өкүлү белгиледи.
Селге кабылган 950 баш кой ага-инилердин фермердик чарбасына таандык болгон. Келтирилген чыгымдар болжол менен 4 миллион сомду түзөт.
