БИШКЕК, 8-май — Sputnik. КРдин Улуттук банкы акыркы үч жумада экинчи жолу валюта рыногунан долларды сатып алды.
Бир ай ичинде доллардын курсу дароо төмөндөдү. Апрель айынын ортосунда Бишкектеги акча алмаштыруу жайлары бир АКШ долларын 63,9 сомдон сатып алса, бейшемби күнү чет элдик валютаны 58,2 сомдон сатып алышкан.
Республикада акча алмаштыруу курсу 1993-жылдан бери эркин тартипте аныкталат. Бул саясатка ылайык, акчанын алмаштыруу курсу коомдун талабына жана сунушуна жараша калыптанат.
Улуттук банктын акча-кредиттик операциялар башкармалыгынын жетекчиси Раушан Сейиткасымова буга чейин билдиргендей, доллардын курсунун өйдө-төмөн болушу убактылуу мүнөзгө ээ. Кышында импорттолуучу товарлар – күйүүчү жана майлоочу майлар көп сатып алынгандыктан, чет элдик валютага болгон талап өсөт. Ал эми жайында талап төмөндөйт
17-апрелде Кыргызстандын Улуттук банкы 11 айда биринчи жолу долларды өлкөнүн валюта рыногунан сатып алган. Мындай операциялар акыркы жолу былтыр май айында болгон. Анда валюта рыногунан 20,5 миллион доллар алынган.
