БИШКЕК, 8-май — Sputnik. Өкмөт башчы Темир Сариев Ош аймагы боюнча бир күндүк иш сапарынын алкагында Кара-Суу районунда жана Ош шаарында өткөн Улуу Жеңиштин 70 жылдыгына арналган салтанаттуу иш-чараларга катышып, ардагерлерди куттуктады.
"Биздин аталар, агалар майданда каармандык менен согушкан. Биз Жеңишке өзүнүн баа жеткис салымын кошкон ардагерлерибиздин жана тылда эмгектенген жарандарыбыздын күжүрмөндүгүн эч качан эстен чыгарбайбыз", — деди Сариев.
Андан соң өкмөт башчы Ош шаарындагы "Өчпөс от" мемориалдык комплексине гүлчамбар коюп жана согуштун ардагери Абдурашид Парпиевдин эстелигин ачуу салтанатына катышты.
Сариев Улуу Ата-Мекендик согуштун ардагери Айтмат Кудайбердиев менен жолугушуп, аны Улуу Жеңиштин 70 жылдыгы менен куттуктады.
Улуу Ата-Мекендик согушка Кыргызстандын 360 миңден ашуун жараны катышкан. Ал эми 150 миңге жакын кыргызстандык жаран согуш талааларынан кайтпай калган.
