БИШКЕК, 6-май – Sputnik. Президент Алмазбек Атамбаев Москва шаарында өтө турган Жеңиштин 70 жылдыгына арналган иш-чарага катыша турчу Улуу Ата Мекендик согуштун ардагерлери менен жолугуп, "1941-1945-жылдардагы Улуу Ата Мекендик согуштагы Жеңишке 70 жыл" мааракелик медалдарды тапшырды.
Жолугушуунун жүрүшүндө Мамлекет башчысы ардагерлерди келе жаткан майрамы — Жеңиш күнү менен куттуктап, бул майрам кыргызстандыктар үчүн өзгөчө маанилүү болгон жана ар дайым болуп кала берээрин белгиледи.
"Биз сиздер менен сыймыктанабыз жана сиздердин эрдигиңиздерди унутпайбыз. Сиздердин атыңыздар ушул согуштун тарыхына алтын тамгалар менен жазылып калат" — деди Атамбаев.
Бүгүн кечинде согуштун ардагерлери Кызыл Аянттагы аскердик парадга катышуу үчүн жөнөп кетишет.
