БИШКЕК, 30-апр. — Sputnik. ЖКда депутаттардин ичинен Надира Нарматова премьер-министрликке талапкер Темир Сариевге трайбализм боюнча коомчулуктун кээ бир катмар тарабынан айып тагылып келе жатканын, мунун канчалык деңгээлде аныктыгын сурады.
Сариев анын каршылаштары эч кандай кынтык таба албагандан кийин, бул жалааны 2005-жылдары ойлоп таап, бир топ убакытка чейин колдонуп жүрүштү деген жүйөөсүн айтты.
"Мен көп балалуу үй-бүлөдө төрөлүп, интернатта өскөндүктөн, жердешчилик кылып, бөлүп-жаруу мага чоочун көрүнүш. Мен интернаттагылардын ынтымагын азыркыга чеийн кармап, уюштуруп келем. Мен калыстыгымды, ачыктыгымды жана тактыгымды буюрса, алдыдагы ишимде далилдейм", — деди ал.
Сариев 2011-жылдан бери КРдин Экономика министри болуп иштеп келе жатат.
Сариевдин өкмөт башчылык кызматке келүүсү туурасындагы кеп өткөн жумада Жоомарт Оторбаев аталган кызматтан кете тургандыгын парламентте билдиргенден кийин айтыла баштаган.
