БИШКЕК, 21-апр — Sputnik. Борбор калаадагы №2-орто мектепте Улуу Жеңишти утурлай, окуучулар согуштун жана тылдын ардагерлерин куттуктап майрамдык концерт коюшту. 11-класстын окуучусу Адина Канатбекова Жеңиш ал үчүн өтө маанилүү экендигин Sputnik маалымат сайтына айтып берди.
Салтанатка чакырылган жыйырмага жакын эмгек ардагерлерине окуучулар мектептин музейиндеги жаңы экспонаттарды көрсөтүп, өздөрүнүн күчү менен даярдалган концертин тартуулашты.
"Бардык иш-чаралар 1-11-класстын окуучулары тарабынан даярдалды. Жеңишке арналган рефераттардын, көркөм окуулардын конкурсу өткөрүлүп, эң мыкты деп табылган эмгектерди мектептин мындан он жыл мурда Улуу Ата мекендик согушка арналып түзүлгөн музейине койдук", — деди мектептин директору Чынара Маразыкова.
Аталган мектептин бүтүрүүчүсү да кезегинде согушка аттанып, от майданында курман болуптур. Учурда ал тууралуу маалыматтарды топтоо жана издөө иштери жүрүп жатканын мектептин өкүлү айтып берди.
"Биздин мектептин партасынан Кравченко Ольга 1941-жылы согушка кеткен экен. Биз ал тууралуу архивге сурамжылоо жибергенбиз. Чехословакияга жакын жерден курман болуптур. Биз анын кайсы жерлерде согушканын, кантип курман болгондугун жана башка маалыматтарды топтоо үчүн Ардагерлер кеңеши менен бирдикте издөө салып, азыр иштер жүрүп жатат", — деп айтып берди мектептин окуу тарбия иштери боюнча бөлүмүнүн башчысы Татьяна Куля.
Ал эми 11-класстын окуучусу Адина Канатбекова согуш темасындагы рефератын Сталинграддагы, Курсктагы, Днепрдеги салгылаштар туурасында жазганын айтты.
"Бул үч салгылаш согуштун жүрүшүндө чечүүчү салгылаштардан болгон. Анда советтик жоокерлердин каармандыгы аркасында аскер күчтөрү алдыга жылып, жеңишке жеткенге мүмкүн болгон", — деп айтып берди Адина Канатбекова.
Адина Жеңиш туурасында биз менен ой бөлүшүп жатып, анын азыркы жашоосунда ардагерлердин, тылдын катышуучуларынын зор салымын белгиледи.
"Кыргызстандан 380 миңден ашык адам чакырылса, анын ичинен 1395 аялдар болгон. Биз ушул адамдардын эмгегинен, каармандыгынан улам азыркы турмушта жашап жатабыз. Жеңиш мен үчүн абдан чоң мааниге ээ. Себеби менин таятам согуштан аман-эсен кайтып келбегенде, менин апам, анан мен бул дүйнөгө жаралмак эмеспиз", — дейт Адина Канатбекова.
Кыргызстандын бардык аймактарында Улуу Жеңиштин 70 жылдыгын утурлай ардагерлерге сый-урмат көрсөткөн ар кыл иш-чаралар өтүп жатат.
