БИШКЕК, 27-мар. — Sputnik. Прокуратура органынын мурдагы кызматкери Кадыралиев алдамчылык, опузалап акча талап кылуу боюнча сыртынан айыпталып, камакка алуу чечими чыккан. Бирок, ал сотко келбегендиктен издөө жарыяланган болчу.
Башкы көзөмөлдөө органынан билдиришкендей, 2015-жылдын 26-мартында айыпталуучу жана жактоочусу кат түрүндө кайрылып, Кадыралиев ден соолугунан улам ооруканада жатканын кабарлашкан. Маалыматты текшерүү учурунда айыпталуучу Бишкек шаарындагы №1 шаардык клиникалык ооруканасынын хирургия бөлүмүнө жаткырылганы аныкталган.
2015-жылдын 26-мартында айыпталуучунун жактоочусу Икрамидин Айткулов Sputnik маалымат сайтынын кабарчысына "Канжар Кадыралиев өз ыктыяры менен прокуратура органдарына барыптыр" деген маалыматты жокко чыгарган эмес, ошол эле учурда тастыктаган да эмес болчу.
2014-жылдын 31-августунда Өзгөндүк ишкер тонолгон. Ишкердин туугандары тоноого Кадыралиев тийиштиги бар экенин билдиришкен. Ал убакта Кадыралиев Ош облустук прокуратурасында иштеп келген. Мамлекет башчы бул ишти тыкыр иликтөөгө алуу керектигин тапшырган болчу.
