БИШКЕК, 19-мар. — Sputnik. Жогорку Кеңештин депутаттары жыйында мурдагы башкы прокурор Аида Салянованын күйөөсү боюнча комиссия түзүүнү биринчи колдоп, бирок, андан кийин ага каршы добуш беришти.
Комиссия түзүүнү "Ар-Намыс" фракциясы демилгелеген.
Кайтадан добуш берүүнүн жыйынтыгында 58 депутат комиссия түзүүгө каршы добуш беришсе, 29 депутат комиссия түзүү керектигин колдошкон.
Мурдагы башкы прокурор Салянованын күйөөсү Бакыт Абдыкапаровго Кылмыш жаза кодексинин 116-беренеси ("Алдамчылык") боюнча кылмыш иши козголгон. Ал "Тазалык" муниципалдык ишканасынын кызмат адамдарына козголгон кылмыш ишти токтотууга жардам берем деп 50 миң доллар акча алган деп айыпталууда.
Ошондой эле, Улуттук мамлекеттик коопсуздук боюнча комитети Бишкек жылуулук борборуна көмүр ташып келүү боюнча Абдыкапаровго экинчи кылмыш иши да тагылган.
