БИШКЕК, 11-мар.— Sputnik. "Коопсуз шаар" долбоору боюнча тендердын жыйынтыгы балким, жокко чыгарылат деп билдирди Ички иштер министри Мелис Турганбаев журналисттерге маалымат жыйынын өткөрүп жатып. Анын айтымында, тендердик комиссия ал министр болуп келгенге чейин түзүлгөн. Тендер үчүнчү ирет өткөрүлүшү мүмкүн.
"Мыйзам боюнча тендерди өткөрүүгө киришпешим керек. Анын жыйынтыгын карап чыгып, менде күмөн саноолор пайда болду. Бул тууралуу президент менен премьер-министрге маалымат бердим. Себеп дегенде иштин акырында макулдашууга кол коюлат, анын аягына чейин мен жооп беришим керек. Жети өлчөп, бир кескен оң", — деди министр.
Тендер боюнча комиссиянын мүчөлөрүнүн баары анын өткөрүлгөн жыйынтыгына канааттанса да, анда азыр айта албай турган башка маалыматтар бар.
Министр жакында өкмөттүк деңгээлде комиссия түзүлүп, иштин туура эрежелер менен өткөндүгүн текшерет.
"Келишимдин акыркы делген вариантына кол койбом, себеби, ага ишенбейм. Мен аны жеңген фирмадан күмөн санап турам. Тендердин биринчи этабында "Стилсофт Бишкек" компаниясы өтпөй калган, ал эми эми экинчи этабында кандайдыр бир жолдор менен өтүп кетиптир. Шектенүүлөр абдан көп", — деп белгиледи Турганбаев.
"Коопсуз шаар" долбоорунун алкагында Бишкек, Ош шаарларында, Бишкек — Каракол жана Бишкек — аэропорт "Манас" жолдору жабдылат. Көзөмөл камералары көчөлөрдүн кесилишинде эле эмес, сейил бак жана эс алуу аймактарында дагы орнотулат.
