БИШКЕК, 8-мар — Sputnik. Кыргызстандын Мамлекеттик каттоо кызматы айдоочулук күбөлүк алуу үчүн айдоочуларды тесттен өткөрүүнүн "Айдоочулар курамын тесттен өткөрүү" деп аталган жаңы системасын киргизүүдө деп билдиришти ведомстводон.
Автоматташтырылган маалымат системасы айдоочулук күбөлүктү биринчи жолу алууда экзамендерди кабыл алууну жана тапшырууну жакшыртуу максатында иштелип чыккан.
"Мындай чара өткөрүлүп жаткан сынактардын же тесттердин сапатын кокустан тандалып алынган суроолордун жардамы менен жакшыртууга мүмкүндүк берет. Андан тышкары, система айдоочунун күбөлүгүн берүүдөгү коррупцияны жоюуга мүмкүндүк берип, экзамен алуучуну билетти тандап берүү мүмкүндүгүнөн ажыратат", — деп белгилешти МККдан.
Экзамен тапшырууда сынактан өтүүчүгө бирдиктүү уникалдуу электрондук ачкыч ыйгарылып, ал 30 жыл сакталышы керек болот. Бул сынактын натыйжалары менен макул болбосо, анын үстүнөн арыз берип сынактан кайра өтүүгө мүмкүндүк берет.
Системада автомектептердин сөзсүз катоого турушу каралган. Окутулуучу топту түзүүдө автомектептер айдоочунун күбөлүгүн алууга талапкерлердин тизмеси көрсөтүлгөн форманы онлайн тартибинде толтуруулары керек болот. Аталган тизме системанын маалымат топтомунда автоматтык түрдө сакталат жана өзгөртүлбөйт.
"Тесттен өткөрүү программасы бардык автомектептерде акысыз орнотулат. Бул окуп жаткандар айдоочулук күбөлүк алууга тесттен өтүү үчүн даярданга мүмкүнчүлүк берүү үчүн жасалмакчы", — деп түшүндүрөт Мамлекеттик каттоо кызматы.
Аталган процедура айдоочунун күбөлүгүн биринчи жолу алууда анын тез арада жана көмүскө даярдалышын жоёт.
"Айдоочулар курамын тесттен өткөрүү" АМСте бардык автомектептер жана айдоочулар курамы жөнүндө маалымат камтылган.
МКК бул система унааны айдоону үйрөтүү сапатын жакшыртууга мүмкүндүк берип, автосүйүүчүлөрдүн билимин жогорулатып жана жаңы айдоочуларды тесттен өткөрүү процессин жакшыртуу менен жол кыймылынын коопсуздугуна оң таасир бере тургандыгын баса белгилейт.
Мамлекеттик каттоо кызматы айдоочулук күбөлүк алууга интернет аркылуу экзамен тапшырууну да сунуштайт. Дареги: http://demoprava.srs.kg/. Бардыгы үчүн кирүү ачкычы — 1. grs.gov.kg расмий сайтында айдоочулар үчүн сынактардын суроолорун талкууга катышса болот.
ИИМдин жол-күзөт кызматында МККнын демилгесин колдошту. ЖККнын маалымат кызматынын жетекчиси Тилек Оторов Sputnik кабарчысына билдиргендей, автомектептердин курсанттарынын билим деңгээли көтөрүлүп, жең учунан айдоочулук күбөлүк берүүлөр олуттуу кыскарат.
