Бишкек, 13-фев,— Sputnik. Таластын Бакай-Ата, Кара-Буура райондорунун бир нече айыл аймактарында суу каптаган жерлерде калыбына келтирүү иштери жүргүзүлүп жатса, бир жагынан суу деңгээли көтөрүлүп, улам жаңы аймактарды каптоодо. ӨКМдин маалыматында, 50 үйдү суу каптоо кооптуулугу турат. Ал эми кооптуулук жаралган үй-бүлөлөр туугандарыныкына көчүрүлүп жатат.
Өзгөчө кырдаалдар министри Кубатбек Боронов 13-февралда суу каптоонун кесепеттерин жеринен көрүү жана тиешелүү чечимдерди кабыл алуу үчүн Талас облусуна барды.
"Кардын эришинен улам, Талас – Тараз автожолунунун батыш жагындагы Кара-Суу дарыясынан нугу көтөрүлүп кетип, үйлөрдү суу каптап жатат. Учурда жалпысынан абалды жөнгө салууга 50 адам жана бир нече техникалар тартылды", — деп билдирди ӨКМдин Талас облустук башкармалыгынын башчысы Талантбек Карымшаков
Бакай-Ата районундагы Өзгөрүш айылында 2015-жылдын 12-февралда эртең менентен тарта жамгырдан жана кардын тез эришинен Кара-Суу дарыясы ашып, жашоочулардын сарайын каптап баштаган. Өзгөрүш айылынын жарандарынын күчү менен техникалар колдонулуп, Кара-Суу суусунун жээгин бекемдөө иштери жүргүзүлүүдө.
Түшкө жакын дарыянын деңгээли тез көтөрүлүп, дагы 13 үйдү каптаган. Бир нече адамар жана ӨКМдин Талас облустук өрткө каршы мамлекеттик кызмат башкармалыгынан отузга чукул адам сууну азайтып, нугун бурууга тартылды. Жарандык коргонуунун түзүмдөрүнөн, жергиликтүү калктан чыккандар жээктерин бекемдөө жана суунун нугун буруу иштерин жасашты.
Кеч курун аталган дарыя дагы көтөрүлүп, каптаган турак-үйлөр менен чарбалар 20га жакындап, коптуулук жаралган 5 үй-бүлө туугандарыныкына көчүрүлдү.
Кечээ түндө Бакай–Ата районундагы Бакай-Ата, Ак-Дөбө эки айылдарындагы лотоктон ашкан суу бир нече үйлөр турак-жайларды каптады.
Бейшеке айыл аймагындагы Кара-Суу айылында саат түш ченде Кара-Суу айылындагы Кара-Суу ашып, болжолу менен дагы 10 турак жайга коркунуч келтирди.
Өзгөчө кырдаал болгон жерлерде, ӨКМдин Ыкчам башкармалыгынын башчысынын орун басары Урматбек Шамыркановдун жетекчилигиндеги министрликтин ыкчам тобу, КР ӨКМдин Талас облустук башкармалыгынын башчысы Карымшаковдун жетекчилигинде облустук башкармалыктан түзүлгөн ыкчам топ, КР Өкмөтүнүн Талас облусундагы ыйгарымдуу өкүлүнүн биринчи орун басары Байыш Жуманазаров жана райондук жарандык коргонуу комиссиялары, Бакай-Ата, Кара-Буура райондорунун акимдери, айыл өкмөттүн башчылары изилдөө иштерин жүргүзүшүүдө. Кооптуу аймактарга күнү-түнү күзөт уюштурулду.
Аба ырайынын бузулушунан улам, ӨКМдин өздүк курамы, түзүмдүк жана аймактык бөлүктөрү күчтөндүрүлгөн режим менен иштеп баштады.
