БИШКЕК, 4-фев — Sputnik. Үй-бүлөнү жана баланы коргоо боюнча башкармалыктын шаардык жана райондук бөлүмдөрү былтыр 2843 күбөлүктү калыбына келтирди деп билдирди Социалдык жактан өнүктүрүү министрлигинин маалымат кызматы.
Өткөн жылы өлкө боюнча 5193 баланын ким экендигин тастыктаган документи жок экендигин аныкталса, алардын жарымына жакынына күбөлүк берилди. Социалдык кызматтардын кызматкерлери мектепке барбай калган 316 баланы аныктап, алардын 226сы класстарына кайтарылган.
Министрликтин маалыматында, республикада 18 жашка чейин 2 млн. 335,4 миң бала жашайт.
"2014-жылы ата-энесинен кароосуз калган 2156 бала аныкталган. Алардын ичинен 643ү асырап алууга берилген. 1013 бала каралып, камкордукка алынса, алтоосу фостердик үйлөргө, 438и балдар үйүнө орноштурулган. Дагы 56 бала боюнча маселе каралып жатат. Ал эми жатак жайлардан (интернаттардан) 139 бала үй-бүлөсүнө кайтарылган", — деп аталган министрликтен билдиришти.
Учурда өлкө боюнча 921 социалдык кызматкерлер 10 миңге чукул пенсия жашындагылар менен ден соолугунан мүмкүнчүлүгү чектелген адамдарды карап, тейлешет. Бир балдарды жана үй-бүлөнү коргоонун райондук же шаардык бөлүмүнө орто эсеп менен үчтөн кызматкер туура келет.
