БИШКЕК, 4-фев — Sputnik. Баткен облусунун Кадамжай районундагы Пум аймагынан Айдаркен чек ара отрядынын чек арачылары мамлекеттик чек араны бузган эки жаранды кармашкан. Бул тууралуу Мамлекеттик чек ара кызматынан билдиришти.
Маалыматка ылайык, 3-февраль күнү кыргызстандык эки жаран кыргыз-өзбек чек арасынан он баш бодо малды Өзбекстандын аймагына айдап кирүүгө аракет кылышкан.
Чек ара мыйзамын бузган жарандар Айдаркен чек ара отрядынын чек арачылары тарабынан кармалып, тийиштүү документтер толтурулган соң, Кадамжай РИИБине өткөрүлүп берилген.
Январь айынын ортосунда да бир үйүр жылкыны Өзбекстандын аймагына мыйзамсыз түрдө айдап өтүүгө аракет кылган жарандар да кармалган болчу.
