БИШКЕК, 3-фев — Sputnik. Каржы министрлигинин маалыматына ылайык, баалуу металлдар жана асыл таштар менен соода операцияларын жасоо жаатында мыйзам талаптарын бузуу өтө көп. Ошол эле учурда, айып пулдардын өлчөмү өтө аз болгондуктан, жоопкерчилик да тартышпайт. Баалуу металлдар менен шугулдангандарга каралган эң жогорку айып пул 5 миң сом. Ошондуктан, кыргыз өкмөтү айып пулдун өлчөмүн он миң сомго чейин көтөрүүнү сунуш кылууда.
Жогорку Кеӊештин Экономикалык жана фискалдык саясат боюнча комитетинде баалуу металлдар менен асыл таштар менен шугулдануу жаатындагы тараптардын жоопкерчиликтерин жогорулатууга "КР Администрациялык жоопкерчилик жөнүндө кодексине өзгөртүүлөрдү киргизүү жөнүндөгү" мыйзамдын долбоору каралып, биринчи окууда добуш берүүгө жөнөтүлдү. Бул тууралуу парламенттин маалымат кызматы билдирди.
Кыргызстанга жылына баалуу металддан жасалган 20 тоннага чейин буюмдар ташылып келет. Мындай буюмдарга толугу менен Кыргызстандын мамлекеттик энтамгасы басылууга тийиш. Бирок, иш жүзүндө ал аткарылбайт. Жоопкерчилик чаралары жетишсиз болгондуктан, миллондогон сомдор казынага түшпөй калууда.
