БИШКЕК, 3-фев — Sputnik. Адилет министри Алмамбет Шыкмаматов кызматтан кетүү тууралуу арызын жазып, анын себептерин түшүндүрүп берди.
Анын расмий кайрылуусуна ылайык, Жогорку Кеңештин көпчүлүк коалициясынын жыйынында Данияр Нарымбаевдин койгон суроосу туура эмес болгон.
"Анын маңызы эл алдында кечирим суроо эмес, анын талабы ультиматум сыяктуу болду. Мен же кечирим сурап министрлик ордумду сактап калам, же ээлеген кызматымдын шайкештиги каралмак, — дейт ал.
Шыкмаматов кечиримдүүлүккө сараң эместигин, эгер ал чындап эле туура эмес болсо, кишинин социалдык же башка статусуна карабастан кечирүүгө даярдыгын белгилейт. Адилет министри бул жерде сөз аброй жөнүндө болуп жатканын, жана Нарымбаевдин койгон суроосу соодалашууга окшоп жатканын айтат. Президенттин аппаратынын жетекчисинин бул кадамынан саясый чайкоочулукту байкаса болорун билдирген Шыкмаматов, мындай нерсеге катышпайм дейт.
"Мен эч качан "креслого" жармашкан эмесмин, мен мамлекеттин байгерлиги үчүн иштеп келгем жана иштей бермекчимин. Мен үчүн ар-намыс ээлеген кызматыман да жогору. Мен ордумду сактап калуу үчүн айтпаган сөздөрүм үчүн кечирим сурабайм", — дейт ал.
Ушундай жагдайдан улам ал кызматтан кетүү чечимин кабыл алган.
Жогорку Кеңештин көпчүлүк коалициясынын жыйынында президенттин аппаратынын жетекчиси адилет министринен жергиликтүү ЖМКга берген маегинде "Аида Салянованын кызматтан кетүүсү Данияр Нарымбаевдин саясый оюну" деп айтканы үчүн кечирим суроону талап кылган.
Шыкмаматов андай деп айтпаганын, анын айткандарын журналист билип туруп бурмалаганын же түшүнбөй калып ушундай деп жазышы мүмкүн деп жооп берген болчу.
