БИШКЕК, 15-янв — Sputnik. Россия аймагындагы окуу жайларда 2015-2016-окуу жылы үчүн бюджеттик негизде билим алууга кыргызстандыктарга 445 орун бөлдү. Квота жогорку жана кошумча кесиптик-техникалык билим алууга мүмкүнчүлүк берет. Бул туурасында Россиянын Кыргызстандагы элчилигинен билдиришти.
Аталган квотадан жергиликтүү жарандардан сырткары, Кыргызстанда жашап жаткан россиялыктар да колдоно алышат. Бул жараянды КРдеги РФтин элчилиги жана Россиялык кызматташтык боюнча өкүлчүлүгү өткөрмөкчү.
"Окууга талапкерлер КРдин буга кызыкдар болгон бийлик органдары менен биргеликте өлкөнүн жалпы билим берүүчү мектептердин билиминин алкагындагы тестирлөөнүн жыйынтыгы жана аңгемелешүү менен тандалат. Баланын билим алуудагы жетишкендиктерин тастыктаган ар кыл документтери, облустук, республикалык жана эл аралык олимпиада боюнча жетишкендиктери да эске алынат. Талапкерлерди тандоо 2015-жылдын 25-февралында аяктайт", — деп билдиришти элчиликтен.
Элчиликтин маалымат кызматы россиялык билим берүүчү окуу жайларына тапшыруу жана талапкерлерди тандоо жараяндары боюнча суроолор жаралса, Маданият жана илим боюнча Россиялык борборго кайрылууну билдирди.
Аталган Борбор Бишкек шаарындагы Эркиндик проспектиси. 2/1 дарегинде жайгашкан. (Буга жооптуу адам, байланыш телефондору жана электрондук дареги — И.Б. Тузова 0 (312) 30 05 12; e-mail: rcnk-kg@mail.ru).
Ал эми түштүк аймактын жашоочулары Ош шаарында жайгашкан РФтин Башкы консулдугуна (Н.В. Мещеряков, тел. (32-22) 2-78-24; e-mail: gencon@mail.kg) кайрылса болот.
