БИШКЕК, 15-янв — Sputnik. Билим берүү жана илим министри Элвира Сариева мектеп мугалимдеринин эмгек акысын жогорулатуу боюнча пландары менен бөлүштү.
Мугалимдердин эмгек акысын төлөө системасы акыркы жолу 2011-жылы реформаланган деп белгиледи министр.
"Бирок өткөн жылы бул системаны өзгөртүү зарылчылыгы жөнүндө маселе бир нече жолу көтөрүлгөн болчу. Мектеп мугалимдеринин иш категорияларын жана аны баалоо системасын киргизүүнү мугалимдер өзүлөрү сунуштап жатат. Жогорку Кеңештин кеңейтилген отурумунда мектеп мугалимдеринин эмгек маянасын жогорулатуу зарылчылыгы жөнүндө чечим кабыл алган", — деди Сариева.
Ведомство башчысынын айтымында, министрлик мектеп мугалимдеринин эмгек маянасын жогорулатуу боюнча өкмөткө бир нече сунуштарды киргизген. Бирок Жогорку Кеңеш тарабынан бекитилген 2015-жылдын бюджетине кошумча каражаттар киргизилген эмес.
"Ошентсе да, биз муну менен токтоп калбайбыз. Биринчиден, мектептерде ченемдик каржылоону киргизүүнү улантабыз. Бул окуу жайларына каржылык көз карандысыздык алып, жыл натыйжалары боюнча каражаттарды мугалимдерге өз алдынча кошумча төлөөгө мүмкүндүк берет. Экинчиден, үстүдөгү жылдын бюджетине өзгөртүүлөрдү киргизүүдө министрлер кабинетинин кароосуна мектеп мугалимдеринин эмгек акысын жогорулатуу үчүн биздин министрликке кошумча каражат бөлүп берүү жөнүндө сунушту киргизүүнү пландап жатабыз", — деп баса белгиледи министр.
Белгиленген ченем азыр 88 пайызга гана аткарылууда, жана окутуучулардын айрым категорияларынын эмгек маянасы максаттуу түрдө жогорулатуу маселеси билим берүү коомчулугу жана Каржы министрлиги менен кеңешүүдөн кийин чечилет. Сариеванын айтымында, ведомство мектеп окутуучулары үчүн категория маселесин кайра карап чыгууну пландоодо.
