БИШКЕК, 13-янв — Sputnik. ФИФА португалиялык футболчу Криштиану Роналдуга 2014-жылдын мыкты оюнчусу катары “Алтын топ" сыйлыгын тапшырды.
ФИФАга катышуучу өлкөлөрдүн футбол боюнча улуттук курама топторунун машыктыруучулары менен капитандарынын добуш берүү жыйынтыктары боюнча Криштиану Роналду 37,66 пайыз, Лионель Месси 15,76 жана Мануэль Нойер — 15,72 пайыз добуш алган.
"Мен үчүн добуш бергендерге ырахмат айткым келет. Бул укмуштуудай жыл болду. Мен дагы иштеп, акыркы кезде жасап жаткандарымды улантсам дейм. Мен күн сайын мурунку күндөн жакшыраак болууга аракет кылгым келет. Бул олжону үйүмө үчүнчү жолу алып келем деп эч ойлогон эмесмин. Мен бардык мезгилдердеги эң улуу оюнчу болгум келет", — дейт Роналду.
Ошентип, Роналду экинчи жыл катары менен ФИФАнын версиясы боюнча дүйнөнүн мыкты футболчусу аталды. Бардыгы болуп португалиялык оюнчу "Алтын топту" үчүнчү жолу утуп алды. Өткөн жылы Криштиану Роналду "Реал" менен Чемпиондор лигасынын кубогун, Испания кубогун, "Алтын бутса" сыйлыгын утуп алып, 2014-жылдагы Европанын эң мыкты оюнчусу деп таанылган.
Футбол сыйлыгы 2010-жылы негизделген. Ага чейин мыкты футболчуну France Football (Ballon d'Or) журналы тандап келген. Ошондой эле "ФИФАнын жыл оюнчусу" сыйлыгы берилчү. Эми болсо мыкты футболчу ФИФАга катышуучу өлкөлөрдүн футбол боюнча улуттук курама топторунун машыктыруучулары менен капитандары жана дүйнө боюнча кадыр-барктуу журналисттер тарабынан аныкталат.
