БИШКЕК, 26-дек — Sputnik. Токтогул Сатылганов атындагы Кыргыз Улуттук филармониясында мамлекет башчысы катышкан президенттик балаты майрамы болду.
Арасында мыкты окугандары, мүмкүнчүлүгү чектелген бөбөктөр кошулуп миңдеген балдар президенттин чакыруусу менен республиканын ар кайсы бурчтарынан келишти. Чогулгандар жаңы жылдык "Щелкунчик" спектаклин көрүп, мамлекет башчысынын колунан эстелик белектерди алышты. Бөбөктөрдүн алдында сүйлөгөн мамлекет башчысы, өз өлкөсүнүн келечек муундарын көрүп, сыймыктанып турганын айтты.
"Биздин бөбөктөрдүн бир нече жылдан кийин мыкты мамлекетте жашашы үчүн колумдан келгендерин баарын жасоого убадамды берем", — деди Атамбаев.
Президент мааниси өтө терең экендигин белгилеп, балдарга көрсөтүлгөн жомокко окшош маанидеги окуяны айтып берди.
"Биздин өлкөнү чычкандар эле эмес, келемиштер башкарып калган. Эл көтөрүлдү да, аларды кууп таратты. Мындай окуялар 2010-жылы, андан бир аз мурда, 2005-жылы болгон. Өлкөдө мындан ары андай келемиштердин падышачылыгы болбойт деп ишенем, бирок, кээ бир келемиштер калып кетип, азыркыга чейин уурдап жатышат. Баарынан, ал тургай балдардын ырыскысынан да уурдап жатышат", — деп белгиледи мамлекет башчысы.
Атамбаев ошону менен катар эле жаш муундар өз мекени менен сыймыктанышы үчүн болгон күч-кубатын жумшаарын айтты.
